Museos de la Red

THE INHERITANCE OF A ENLIGHTENED IN WESTERN ASTURIAS

UN TERRITORIU, UN PATRIMONIU, UNA COMUNIDÁ

Tien una coleición etnográfica representativa de la vida tradicional del oriente d’Asturies. Los oxetos que s’amuesen vencéyense cola arquitectura rural que los agospia y avérenmos, amás, a actividaes feches per fuera casa, a la vera o en sitios más alloñaos: les tierres de llabor, la viesca, el prau de la ilesia’l día la fiesta, el ríu, la escuela, la fonte.

LA VIESCA COMO MATERIA PRIMA PA LOS ASTURIANOS

L’Ayuntamientu de Casu inaguró’l Museo de la Madera n’avientu de 2001. Tien la so sede en Veneros, nuna casona del sieglu XVI. El muséu presenta una esposición temática na qu’amuesa’l valir de la madera na sociedá tradicional asturiana, con especial enfotu nel calzáu fechu con esta materia prima: la madreña.

UN PERCORRÍU PELA HISTORIA DE LA EDUCACIÓN N’ASTURIES

El muséu asítiase nel llugar de Viñón, conceyu de Cabranes, a 7 Km de Villaviciosa y a quince de Nava. L’edificiu diseñólu l’arquitectu provincial Javier Aguirre Iturralde ya inaguróse en 1908 como escuela unitaria con sitiu pa 120 escolinos repartíos en dos aules, una pa neños y otra pa neñes, les dos nel andar d’abaxo. L’andar d’arriba tomábenlu dos viviendes, una pal mayestru y otra pa la mayestra.

LA SIDRA: DAQUÉ MÁS QU’UNA BEBIDA PA LOS ASTURIANOS

Asitiáu na villa de Nava, a 30 km d’Uviéu, tien l’oxetivu d’espublizar y promocionar esta bebida d’Asturies. La esposición xébrase de la idea museística tradicional, que ve’l muséu como una escoyeta de pieces ordenaes según los criterios temáticos o tipolóxicos. El muséu tien como retu principal que’l visitante participe activamente. Asina, pel aciu d’un sistema espositivu envolvente, mira de tresmitir tola información posible no tocántenes a la fechura, el consumu y la historia de la sidra.

LA VENCEYA DEL HOME COLA MAR, LA PESCA Y LA NAVEGACIÓN

Fundáu en 1948 pol Ayuntamientu de Gozón, ye’l decanu de los museos asturianos. Ta dedicáu a la cultura mariniega y poro ye un muséu abiertu y universal, magar que se centra mayormente nel ámbitu asturianu y cantábricu. La gran variedá d’oxetos qu’acueye faenlu atractivu y prestosu.

LA LLECHE, EL QUESU Y LA MANTEGA NA SOCIEDÁ TRADICIONAL

El muséu asítiase en La Foz de Morcín, a 15 km al sur d’Uviéu. Créase en 1990 pol aciu de la comisión organizadora del Certamen de Quesu d’Afuegu’l Pitu. En 1993 l’Ayuntamientu de Morcín y la Hermandá de La Probe funden l’Asociación Amigos de los Quesos qu’emprincipia cola gueta y la recuperación de pieces, y desenrolla un bon llabor investigador.

FORMES DE VIDA NOS PUELOS DE LA MONTAÑA ASTURIANA

Los cambeos perfondos qu’hebo nes comunidaes rurales acabante’l sieglu XIX truxeron el desdexu de munchos de los preseos y tarecos qu’hasta entós yeren imprescindibles. La necesidá de caltener estos elementos, qu’a la fin constitúin la historia d’un puelu, animó al Ayuntamientu de Quirós, n’andecha cola Conseyería d’Educación y Cultura del Gobiernu del Principáu d’Asturies, a la creación d’esti muséu etnográficu, col que quier amosar y representar la manera de vivir, los preseos y les maquinaries d’estos puelos de la montaña, dándo-yos el valir y el respetu que merecen.

LA ESCANDA Y LA CULTURA DEL PAN

El muséu amuesa la cultura tradicional de dellos conceyos asitiaos nel centru d’Asturies. Creáu en 1982 pol Ayuntamientu de Grau, dende 1995 la so esposición permanente ta allugada nuna nave industrial de La Cardosa, a unos 500 m del centru la villa de Grau. Tien amás, na casa la cultura de Grau (Palaciu Miranda Valdecarzana), unes sales pa esposiciones temporales y una muestra de la fechura la sidra na que rescampla un llagarón de pesa pa prensar la magaya.

LOS OFICIOS TRADICIONALES Y LES CONSTRUCCIONES TEITAES

El Ecomuseo de Somiedo quier asoleyar dafechu tolos elementos etnográficos (lo mesmo una goxa qu’una braña entera) tocántenes a una cultura rural que va camín de desaniciase, pero qu’inda pue rastrexase nos puelos y el paisax somedán.