Inicio> Museos de la Red > Museo de la Escuela Rural de Asturias

Museo de la Escuela Rural de Asturias


UN PERCORRÍU PELA HISTORIA DE LA EDUCACIÓN N’ASTURIES

Logotipo del Museo de la Escuela Rural de AsturiasEl muséu asítiase nel llugar de Viñón, conceyu de Cabranes, a 7 Km de Villaviciosa y a quince de Nava. L’edificiu diseñólu l’arquitectu provincial Javier Aguirre Iturralde ya inaguróse en 1908 como escuela unitaria con sitiu pa 120 escolinos repartíos en dos aules, una pa neños y otra pa neñes, les dos nel andar d’abaxo. L’andar d’arriba tomábenlu dos viviendes, una pal mayestru y otra pa la mayestra.

Exterior del Museo de la Escuela Rural de CandamoEl muséu abrió al públicu n’agostu de 2002 y ye de titularidá municipal. La que fuere la primer escuela construyida nel conceyu acueye anguaño una coleición perbona de moblame y material escolar d’ente 1911 y 1970. Ye espeyu d’una dómina y d’una conceición del enseñu distinta de los métodos de güei. Amás, nes sales del muséu pue vese una bona partida de xuguetes de distintes dómines que completen l'universu infantil.

Interior del Museo de la Escuela Rural de AsturiasAl traviés de la visita ufiértase un percorríu cronolóxicu pela historia de la educación n’Asturies. El visitante pue adentrase nuna escuela de la República o nuna del franquismu. Siempres tien como referencia a persones qu’un día s’educaron nes sos aules, aportándo-yos a los visitantes el so testimoniu pa qu’algamen una visión correcha de la escuela, la so arquiteutura, métodos y medios didáuticos, y mou de vida de mayestros y escolinos.

Cocina de la casa’l mayestruSiguiendo’l diseñu del arquiteutu, refízose la vivienda del maestru, pa crear un espaciu au s’espeye la vida familiar y llaboral.

La museografía, señardosa de les aules y la vivienda, tien como oxetivu que los visitantes se metan na escenografía ya interactúen colos sos elementos pa que puean maxinar situaciones derivaes de vivir n’otros espacios y tiempos.

El Museo de la Escuela Rural de Asturias ta énte la ilesia románica de san Julián de Viñón (s.XI), a pocos metros del área recreativa de Peña Cabrera y del entamu de la Ruta de la “Arquitectura Tradicional” que pasa pel cuásique tol conceyu Cabranes.

 

Carretera AS-255, km 7.5
33310 Viñón
Cabranes

Tel. 985 898 213 / 985 898 002

www.museodelaescuelarural.com
museodelaescuelarural@cabranes.es

Horariu
Miércoles: 11.00-14.00
Sábadu: 11.00-14.00 y 16.00-18.00
Domingu: 11.00-14.00