Inicio> Museos de la Red > Museo Marítimo de Asturias

Museo Marítimo de Asturias


LA VENCEYA DEL HOME COLA MAR, LA PESCA Y LA NAVEGACIÓN

Logotipo del Museo Marítimo de AsturiasFundáu en 1948 pol Ayuntamientu de Gozón, ye’l decanu de los museos asturianos. Ta dedicáu a la cultura mariniega y poro ye un muséu abiertu y universal, magar que se centra mayormente nel ámbitu asturianu y cantábricu. La gran variedá d’oxetos qu’acueye faenlu atractivu y prestosu.

Fachada principal del muséuLa esposición divídese en cuatro estayes:

Bioloxía marina. Sirve p’averanos al mundu marín. Nella hai una bona partida d’exemplares de pexes y plantes de la mar, dende los fósiles que nos falen de la vida fai millones d’años hasta los que puen vese vivos nos acuarios.

Carpintería de ribera. Amuesa’l procesu de fechura de les embarcaciones de madera tradicionales, esponiendo semeyes, planos, plantiyes, ferramientes y demás preseos propios d’esti oficiu.

Pesca tradicional. Esposición que complementa la d’enantes y qu’amuesa cómo se ganaben la vida los nuesos antepasaos. Nella enséñense ferramientes y artes de pesca, acompañaos d’embarcaciones y bien de complementos como ancles, ropes, cestería, etc.
Vista parcial d’una de les sos árees temátiquesHistoria de la navegación. Al traviés de la esposición de más de mediu centenar de maquetes, amuésase’l desendolcu de los barcos dende l’Antigüedá hasta anguaño.
Dedica espacios al salvamentu marítimu, a l’Armada española y a la marina mercante asturiana.

Amuésase, amás, una bona coleición d’iconografía marítima fecha con dellos materiales (cerámica, marfil, cristal), amás de muestres d’arte popular, barcos de xuguete y otros elementos figurativos y de tema mariniegu.

Hai una biblioteca especializada y archivu documental.

El Museo Marítimo asítiase énte la bahía de Lluanco, que tien una mariña enllena de paseos y siendes pa percorrelu. Ente les guapures del puelu, arrodiáu de paisaxes prestosos enforma, llama l’atención sobremanera’l Cabu Peñes.

Calle de Gijón, 8
33440 Lluanco (Gozón)

museomaritimo@ayto-gozon.com

Tel.: 985 880 101

Horariu:
Iviernu
De martes a sábadu: 11.00-14.00 y 17.00-20.00
Domingu y festivos: 11.00-14.00

Branu (xunetu y agostu)
De martes a domingu: 11.00-14.00 y 18.00-21.00

Selmana Santa y pontes: horarios especiales

Llunes peslláu