Inicio> Museos de la Red > Muséu Etnográficu de la Llechería

Muséu Etnográficu de la Llechería


LA LLECHE, EL QUESU Y LA MANTEGA NA SOCIEDÁ TRADICIONAL

Logotipo del Muséu Etnográficu de la LlecheríaEl muséu asítiase en La Foz de Morcín, a 15 km al sur d’Uviéu. Créase en 1990 pol aciu de la comisión organizadora del Certamen de Quesu d’Afuegu’l Pitu. En 1993 l’Ayuntamientu de Morcín y la Hermandá de La Probe funden l’Asociación Amigos de los Quesos qu’emprincipia cola gueta y la recuperación de pieces, y desenrolla un bon llabor investigador.

Sala con delles máquinesLa coleición del muséu tien más de quinientes pieces, mercaes mayormente en dellos conceyos asturianos y repartíes en cuatro estayes: la ganadería, la lleche, la mantega y el quesu. Tamién tien una sala d’audiovisuales, biblioteca especializada y archivu documental.

Reproducción d’una cueva pa curar los quesosNa visita puen conocese los métodos y preseos usaos pa la ellaboración tradicional de la mantega y el so desendolcu, asina como la venta nos mercaos y la so esportación.

Amuésase una bona coleición de mantegueres, odres, botíes y firidores pa mazar la mantega, amás de delles desnatadores centrífugues y aperios p’amasar. Otra estaya tien distintes races de moldes, sellos pa marcar, prenses, máquines d’amasar y otros preseos usaos na sociedá tradicional pa la fechura de clases estremaes de quesu (de bota u odre, de vexiga, de concu, de Casu, de Cabrales, etc.).

Tamién se reproduz una cueva pa curar el quesu azul, con dalgunes ferramientes y materiales tocántenes a estos llabores.

El conceyu de Morcín asítiase na montaña central asturiana y forma parte del paisax protexíu de la Sierra del Aramo, que tien muncha importancia no tocántenes a los animales y el paisax. Esta montaña tamién agospia armentíos abondos.

Calle Naveo, 31
33161 La Foz de Morcín (Morcín)

info@morcin.com

Tel. 985 795 222 / 985 795 461
Fax: 985 783 162

Horariu
De llunes a domingu: 10.00-13.30 y 16.00-19.30