La Red de Museos Etnográficos de Asturias emprincipió a funcionar nel añu 2001 col preste de la Conseyería de Cultura y Turismo del Principáu d’Asturies. El so oxetivu ye coordinar los trabayos de xestión de coleiciones, espardimientu, investigación y formación nos museos d’esta mena qu’hai n’Asturies.

Mini mapa Museos
español
english
français
asturiano

Muséu del Pueblu d'Asturies

EL CALTENIMIENTU Y L'ESPARDIMIENTU DE LA MEMORIA HISTÓRICA DE LOS ASTURIANOS

Logotipo del Museo del Pueblo de AsturiasMuséu rexonal que tien el finxu de caltener la memoria del puelu asturianu. Fundáu en 1969 pol Ayuntamientu de Xixón, acueye bones coleiciones de materiales etnográficos, instrumentos musicales tradicionales, semeyes antigües, testimonios de memoria oral y música tradicional, artes gráfiques y documentos escritos personales, de comercios y d'industries rurales..

Museo Casa Natal del Marqués de Sargadelos

LA MANDA D’UN ILUSTRÁU NEL OCCIDENTE D’ASTURIES

Logotipo del Museo Casa Natal de SargadelosEl muséu ta afincáu en Ferreirela de Baxo (Santalla d’Ozcos) na casa au nació Antonio Raimundo Ibáñez, marqués de Sargadelos (1749–1809). Ta dedicáu a la vida y la obra d’esti comerciante, industrial ya ilustráu, qu'a lo cabero del sieglu XVIII llevantó en Sargadelos (Cervo, Lugo) una de les primeres fábriques de fundición de fierro colao y loza d’España. La esposición suliña la venceya d’esti personax cola tierra na que nació, onde anició dende cuantayá una importante industria de fierro forxao, y tien l’envís d’esmolecer la xente pol caltenimientu del patrimoniu cultural de so.

Museo Etnográfico de Grandas de Salime

UN MUSÉU VIVU NEL OCCIDENTE D’ASTURIES

Logotipo del Museo de GrandasInaguráu en 1984, el muséu ta asitiáu na villa de Grandas de Salime, na que viven 640 persones y ye capital d’un conceyu de 114 km2 y 1.400 habitantes. La idea de crear un muséu p’amosar les ferramientes, máquines y preseos de más raigón nel mundu rural tradicional del occidente d’Asturies foi de José María Naveiras Escanlar. Dende 1989 el muséu allúgase na rectoral de la mesma villa y nos años vinientes foi medrando enforma.

Museo Etnográfico Juan Pérez Villamil

LA VIDA DEL HOMBRE EN EL MAR, EL CAMPO Y LA EMIGRACIÓN

Logotipo Museo Juan Pérez VillamilEl Museo Etnográfico Juan Pérez Villamil, asitiáu na villa marinera de Veiga, nel conceyu de Navia, inaguróse en setiembre de 2001. Creóse pol aciu de l’Asociación Cultural Amigos de la Historia, con mires d’agasayar a la familia mariñana y d'aldea, ensin escaecer a los indianos.

Museo Vaqueiro de Asturias

LA TRESHUMANCIA COMO MOU DE VIDA

Logotipo del Museo VaqueiroInaguráu’l 29 de xunetu de 2000 en Naraval (Tinéu), afayólu l’Asociación Cultural Conde de Campomanes, de Tinéu, y creólu l’Asociación Cultural Manxelón, de Naraval, de la que depende. Los sos finxos son l’estudiu y la caltenencia de testimonios venceyaos colos vaqueiros d’alzada, grupu social de ganaderos treshumantes que n’aportando’l bon tiempu marchaben de los puelos d’iviernu y xubíen pa les brañes asitiaes no alto los cordales.

Ecomuseo de Somiedo

LOS OFICIOS TRADICIONALES Y LES CONSTRUCCIONES TEITAES

Logotipo del Ecomuseo de SomiedoEl Ecomuseo de Somiedo quier asoleyar dafechu tolos elementos etnográficos (lo mesmo una goxa qu’una braña entera) tocántenes a una cultura rural que va camín de desaniciase, pero qu’inda pue rastrexase nos puelos y el paisax somedán.

Museo Etnográfico de Grado

LA ESCANDA Y LA CULTURA DEL PAN

Logotipo del Museo Etnográfico de GradoEl muséu amuesa la cultura tradicional de dellos conceyos asitiaos nel centru d’Asturies. Creáu en 1982 pol Ayuntamientu de Grau, dende 1995 la so esposición permanente ta allugada nuna nave industrial de La Cardosa, a unos 500 m del centru la villa de Grau. Tien amás, na casa la cultura de Grau (Palaciu Miranda Valdecarzana), unes sales pa esposiciones temporales y una muestra de la fechura la sidra na que rescampla un llagarón de pesa pa prensar la magaya.

Museo Etnográfico de Quirós

FORMES DE VIDA NOS PUELOS DE LA MONTAÑA ASTURIANA

Logotipo del Museo de QuirósLos cambeos perfondos qu’hebo nes comunidaes rurales acabante’l sieglu XIX truxeron el desdexu de munchos de los preseos y tarecos qu’hasta entós yeren imprescindibles. La necesidá de caltener estos elementos, qu’a la fin constitúin la historia d’un puelu, animó al Ayuntamientu de Quirós, n’andecha cola Conseyería d’Educación y Cultura del Gobiernu del Principáu d’Asturies, a la creación d’esti muséu etnográficu, col que quier amosar y representar la manera de vivir, los preseos y les maquinaries d’estos puelos de la montaña, dándo-yos el valir y el respetu que merecen.

Muséu Etnográficu de la Llechería

LA LLECHE, EL QUESU Y LA MANTEGA NA SOCIEDÁ TRADICIONAL

Logotipo del Muséu Etnográficu de la LlecheríaEl muséu asítiase en La Foz de Morcín, a 15 km al sur d’Uviéu. Créase en 1990 pol aciu de la comisión organizadora del Certamen de Quesu d’Afuegu’l Pitu. En 1993 l’Ayuntamientu de Morcín y la Hermandá de La Probe funden l’Asociación Amigos de los Quesos qu’emprincipia cola gueta y la recuperación de pieces, y desenrolla un bon llabor investigador.

Museo Marítimo de Asturias

LA VENCEYA DEL HOME COLA MAR, LA PESCA Y LA NAVEGACIÓN

Logotipo del Museo Marítimo de AsturiasFundáu en 1948 pol Ayuntamientu de Gozón, ye’l decanu de los museos asturianos. Ta dedicáu a la cultura mariniega y poro ye un muséu abiertu y universal, magar que se centra mayormente nel ámbitu asturianu y cantábricu. La gran variedá d’oxetos qu’acueye faenlu atractivu y prestosu.

Museo de la Sidra de Asturias

LA SIDRA: DAQUÉ MÁS QU’UNA BEBIDA PA LOS ASTURIANOS

Logotipo del Museo de la Sidra de NavaAsitiáu na villa de Nava, a 30 km d’Uviéu, tien l’oxetivu d’espublizar y promocionar esta bebida d’Asturies. La esposición xébrase de la idea museística tradicional, que ve’l muséu como una escoyeta de pieces ordenaes según los criterios temáticos o tipolóxicos. El muséu tien como retu principal que’l visitante participe activamente. Asina, pel aciu d’un sistema espositivu envolvente, mira de tresmitir tola información posible no tocántenes a la fechura, el consumu y la historia de la sidra.

Museo de la Escuela Rural de Asturias

UN PERCORRÍU PELA HISTORIA DE LA EDUCACIÓN N’ASTURIES

Logotipo del Museo de la Escuela Rural de AsturiasEl muséu asítiase nel llugar de Viñón, conceyu de Cabranes, a 7 Km de Villaviciosa y a quince de Nava. L’edificiu diseñólu l’arquitectu provincial Javier Aguirre Iturralde ya inaguróse en 1908 como escuela unitaria con sitiu pa 120 escolinos repartíos en dos aules, una pa neños y otra pa neñes, les dos nel andar d’abaxo. L’andar d’arriba tomábenlu dos viviendes, una pal mayestru y otra pa la mayestra.

Museo de la Madera de Caso

LA VIESCA COMO MATERIA PRIMA PA LOS ASTURIANOS

Museo de la MaderaL’Ayuntamientu de Casu inaguró’l Museo de la Madera n’avientu de 2001. Tien la so sede en Veneros, nuna casona del sieglu XVI. El muséu presenta una esposición temática na qu’amuesa’l valir de la madera na sociedá tradicional asturiana, con especial enfotu nel calzáu fechu con esta materia prima: la madreña.

Museo Etnográfico del Oriente de Asturias

UN TERRITORIU, UN PATRIMONIU, UNA COMUNIDÁ

Museo Etnográfico del Oriente de AsturiasTien una coleición etnográfica representativa de la vida tradicional del oriente d’Asturies. Los oxetos que s’amuesen vencéyense cola arquitectura rural que los agospia y avérenmos, amás, a actividaes feches per fuera casa, a la vera o en sitios más alloñaos: les tierres de llabor, la viesca, el prau de la ilesia’l día la fiesta, el ríu, la escuela, la fonte.